रत्ननगर, चितवन
साउन ११
रत्ननगर नगरपालिकाको टाडी चोक देखि निपनि चोक सम्मको नमूना सडकमा जस्तो बिजोग सायदै अरु सडकमा नहोला । यो सडकमा खाल्डो हो या खाल्डोमा सडक हो सवारी चालकलाई छुट्याउनै मुस्किल हुने गरेको छ । यो सडक भएर यात्रा गर्नेहरुले सडकमा जात्रा नै देख्न पाउँछन् । नयाँ सडक पिच निर्माण पुरा नहुँदै ठुला ठुला खाडल यो भन्दा बढि जात्रा कहाँ हुन्छ र यस्तो हुँदा पनि निर्माण कम्पनिलाई सडक निमार्णमा दवाब सृजना गर्न सरोकारवाला निकायको कुनै चासो छैन । सरोकारवाला निकाय मौन छन् । योे भन्दा ठुलो जात्रा के होला र ? सवारी चालकहरु प्रश्न गर्छन् ।
राज्यले संमृद्ध नेपाल सुखी नेपालीको नारा भजाई रहेको छ । तर पुर्व पश्चिम राजमार्गको चितवनको सौराहा छिर्ने मुख्य सडकको अवस्था यस्तो छ । यहि सडक हुदै सौराहा जाने हजारौ पर्यटकले एक पटक यात्रा गर्दैमा बुझ्ने छन् संमृद्ध नेपाल सुखी नेपालीको नारा कति सार्थक हुन्छ भन्ने कुरा ।
राज्यको मुख्य मार्ग पुर्व पश्चिम राजमार्ग त्यसमा पनि नेपालको तेस्रो पर्यटकिय नगरी चितवन र सौराहा प्रवेश गर्ने मुख्य सडक यसरी ज्यानमारा सडकका रुपमा बिकास भई रहदा राज्य भने २०२० लाई भ्रमण वर्षका रुपमा मनाउने उद्धघोष गरिरहेको छ ।
जाबो १ किलोमिटर सडक बनाउन नसकेर पर्यटकलाई हरिबिजोग देखाउने यो राज्यले २०२० मा नेपाल आउने पर्यटकलाई यस्तै धराप सडक देखाएर नेपालको अन्र्तराष्टिय क्षेत्रमा थप बेइजत गर्न खोजेको यात्रुहरु बताउँछन् ।
काम भन्दा धेरै भाषण गर्ने र चर्का कुरा गर्न जाने सफल नेता भईने भन्ने भ्रम पालेका नेताकै कारण यत्तिका समय सम्म पनि सडक निर्माणले गति नपाएको र भ्रष्ट निमार्ण कम्पनिहरुले लापरबाहि गर्ने छुट पाएको स्थानीयहरुले बताए ।
यो सडक निमार्ण कार्य पुर्ण रुपमा सम्पन्न नहुँदै ठुला ठुला खाडल परेर यात्रा निकै जोखिम पुर्ण बनेको छ । रत्ननगर नगरपालिकाले नमूना सडक भनि नामाङ्ककरण गरेको यो सडक लाई स्थानीय र सवारी चालकले भने ज्यानमारा सडक भनि नामाङ्ककरण गर्न थालेका छन् । सडक डिभिजन कार्यालय चितवनले निमार्ण गरेको सो सडकको निमार्णको जिम्मा श्रेष्ठ कन्सट्रक्सनले पाएको हो । यो सडकका कारण दैनिक दर्जन बढि ठुला साना सवारी दुर्घटना हुने गरेको सवारी चालकहरुले बताएका छन् ।
यस्तो बिजोग अवस्था हुँदा पनि नगरपालिकाले सडक निमार्णमा सडक डिभिजन र निमार्ण कम्पनिलाई खबरदारी गर्न नसक्नु निकै दुखद कुरा भएको चालकहरु बताउँछन् ।
सडक बिभागले भने सडक मर्मत गर्नको लागि श्रेष्ठ कन्सट्रक्सनलाई पटक पटक आग्रह गरेको बताएको छ । श्रेष्ठ कन्सट्रक्सनले सडक निर्माणमा चरम लापरबाहि गरेको भन्दै उसलाई कारबार्ही गरी कालोसुचिमा राख्नु पर्ने स्थानीयहरुले माग गरेका छन् ।
यता रत्ननगर नगरपालिकाका मेयर नारायण वनले भने स्थानीय निकायले यो सडक मर्मतमा केहि गर्न नसक्ने भन्दै उम्कने काम गर्नु भएको छ । आफुहरुले सडक बिभागलाई तत्कालै सडक मर्मत गरिदिन आग्रह गर्दै पत्राचार गरेको बताउँदै सडक आफनो अधिकारमा नपर्ने भन्दै आफुले सम्बन्धीत निकायलाई आग्रह मात्रै गर्न सक्ने तर्क गर्नु भयो ।