काठमाडौं, भाद्र २१
नायक पल शाहलाई नवलपुर जिल्ला अदालतले अढाई वर्ष जेल सजाय सुनाएको छ ।

न्यायाधीशले बाल यौन दुरुपयोगको कसुरलाई टेकेर सो फैसला गरेका हुन् ।

जबरजस्ती करणी मुद्दामा अभियोग पत्र दर्ता भए पनि पछि मुद्दा फैसला गर्दा बाल यौन दुरुपयोगको कसुरलाई टेकेर फैसला गरिएको थियो ।

मंगलवार न्यायाधीश यज्ञप्रसाद आचार्यको इजलासको बहसपछि यो फैसला भएको हो ।

यस्तै अदालतले २५ हजार जरिवाना र १० लाख क्षतिपूर्तिको सजाय पनि सुनाएको छ ।

एक नाबालिग गायिकाले बलात्कार सम्बन्धी उजुरी गरेपछि शाह मुद्दामा पुर्पक्षका लागि थुनामा रहेका छन् ।

ती गायिकाले नवलपुर र तनहुँमा गरी दुई ठाउँमा उजुरी दिएपछि शाहले दुई वटा जिल्ला अदालतमा एकै पीडितबाट बलात्कार मुद्दा खेपिरहेका छन् ।

नाबालिग गायिकाले अदालतमा बयान फेर्दै शाहविरुद्धको आरोप झुटा भएको उल्लेख गरेकी थिइन् ।