हिमालदेव पंगेनी ,
मंसीर १४ । विवेकशिल युवा समाज गैंडाकोटले भुजेल गाउँका अति विपन्न परीवारलाई जाडोको लत्ता कपडा लगायतका भुजेल गाउँमा रहेको विद्यालयका ५० जना भन्दा बढी विद्यार्थीहरुलाई शनिबार शैक्षिक कार्यक्रम वितरण गरिएको छ । पछिल्लो समय दुइ महिना अगाडी स्थापना भएको सामाजिक संस्था विवेकशिल युवा समाज गैंडाकोटले भुजेल गाउँमा रहेका ३४ घर परिवारका सदस्यहरुलाई जाडो यामबाट बच्ने खालका लत्ता कपडा वितरण गरिएको संस्थाका अध्यक्ष रोशन परियारले जानकारी दिनुभयो । विशेष गरी दुर्गम गाउँको रुपमा परिचित गैंडाकोट वडा नम्बर ३ को भुजेल गाउँका ३४ विपन्न घरपरिवारको बालबालिका लगायत अन्य उमेर समुहका व्यक्तिहरुलाई बिशेष गरी जाडोका लत्ता कपडा वितरण गरिएको अध्यक्ष परियारले बताउनुभयो ।

जाडोबाट बच्न सहज होस भन्ने मनासायले न्यानो लत्ता कपडा वितरण गरिएको उहाँको भनाई छ । साथै भुजेल गाउँमा रहेको एक मात्र जुना प्रारम्भिक विद्यालयका पचास भन्दा बढी बालबालिकालाई आवश्यक शैक्षिक सामग्री समेत वितरण गरिएको संस्थाका सचिव पवन केसीले जानकारी दिनुभयो । संस्थाका अध्यक्ष रोशन परियारको अध्यक्षता र गैंडाकोट वडा नं. ३ का वडा अध्यक्ष शिवकान्त तिवारीको प्रमुख आतिथ्यतामा भएको सो कार्यक्रममा विद्यालयका व्यवस्थापन समितिका अध्यक्ष, विद्यालयका प्रधानाध्यापक , शिक्षकहरु , समाजसेवी व्यक्तित्वहरुको सहभागिता रहेको थियो ।

यस अघि पनि यस संस्थाले विभिन्न स्थानमा नगद तथा जिन्सी सहयोग गर्र्दै आएको र जनताको दुःखमा साथ दिनका लागि संस्था सँधै लागि पर्ने संस्थाका अध्यक्ष परियारले प्रतिवद्धता समेत व्यक्त गर्नुभयो । सो कार्यक्रममा संस्थाका उपाध्यक्ष अम्बिक कार्की , कोषाध्यक्ष अंकित गुरुङ् लगायत अन्य सदस्यहरुको पनि सहभागिता रहेको थियो ।

यसैबीच संस्थामा आवद्ध व्यक्तिहरुले आँफै स्रोत जुटाएर सहयोग गर्दै आएको कोषाध्यक्ष अंकित गुरुङ्ले बताउनुभयो । आगामी दिनमा अति विपन्न परिवारका सदस्य एवं विभिन्न विद्यार्थीहरुलाई सहयोग गर्ने उद्येश्य रहेकोले सहयोगी मनहरुलाई संस्था मार्फत सहयोग गर्न संस्थाका अध्यक्ष परियारले आग्रह समेत गर्नुभएको छ ।