मंसीर १४ । प्रधानमन्त्री केपी शर्मा ओली र नेपाल भ्रमणमा रहेका चीनको राज्यपरिषद् सदस्य तथा रक्षामन्त्री वेइ फेङ्हेबीच भेटवार्ता भएको छ । आइतबार नेपाल भ्रमणमा आएका फेङ्हेले प्रधानमन्त्रीको सरकारी निवास बालुवाटारमा प्रधानमन्त्री ओलीसँग भेट गरेका हुन् । प्रधानमन्त्री सँगको भेटमा दुई मुलुकको दुई पक्षिय सहयोगको बारेमा कुराकानी भएको थियो । हाल रक्षा मन्त्रालयको जिम्मेवारी लिनुभएका प्रधानमन्त्री ओलीसँग भेट गर्नुअघि फेङ्हेले नेपाली सेनाको जंगीअड्डामा प्रधानसेनापति पूर्णचन्द्र थापासँग भेटवार्ता गरेका थिए । उनी सोमबार नै स्वदेश फर्किनेछन् । यसैबीच नेकपा भित्रको विवाद मिलाउन चिनको राजदुतको सक्रियता भएको बेला रक्षा मन्त्रीको भ्रमण हुनुलाई अर्थपूर्णमा हेरिएको छ । यद्यपी पार्टीको विवादका बारेमा चिनका रक्षामन्त्रीसँग के कसरी कुराकानी भयो भन्ने बारेमा भने कुनै पनि कुरा बाहिर आएको छैन । पछिल्लो समय नेकपाको विवाद चिनको दवाबमा मिलेको हल्ला चलेको र यस पाली पनि राजदुतको सक्रियता बढेको भन्दै रक्षामन्त्रीको भ्रमण समेत त्यसै सन्दर्भमा भएको जानकारहरु बताउँछन् ।