पुष १७ । राष्ट्रिय प्रजातन्त्र पार्टी (राप्रपा) अध्यक्ष कमल थापाले सर्वपक्षीय सम्मेलनमार्फत हिन्दु राष्ट्र र राजसंस्था पुर्नस्थापित गर्न माग गर्नुभएको छ । नभए सडकबाटै आफ्ना मान्यता स्थापित गर्ने उनको चेतावनी दिनुभएको छ । शुक्रबार काठमाडौंमा विरोध प्रदर्शनपछि आयोजित सभालाई सम्बोधन गर्दै राप्रपा अध्यक्ष थापाले हिन्दु राष्ट्र र राजसंस्थाको पुनर्स्थापना अब राप्रपाको मात्र एजेण्डा नभएको बताउनुभयो । हिजो कठिन घडीमा राप्रपाले बोकेर हिडेको भन्दै अध्यक्ष थापाले अब आम नेपालीको एजेण्डा बनिसकेको बताउनुभयो । थापाले यदि हिन्दु राष्ट्र र राजसंस्थालाई पुर्नस्थापित गर्ने र संघीयतालाई पुनरावलोकन नगर्ने हो भने सडकबाटै आफ्ना मान्यता स्थपित गर्ने बताउनुभयो । सिंहदरबार र शीतल निवासका शासकहरुलाई सार्वजनिक आह्वान गर्दै राप्रपा अध्यक्ष थापाले देश बचाउन, प्रजातन्त्र र राष्ट्रियतालाई बलियो बनाउन र आर्थिक समृद्धिका निमित्त आवश्यक प¥यो भने मर्न र मार्न पनि तयार भएर सडकमा आएको प्रतिक्रिया दिनुभयो । संसद भंग भएपछि संवैधानिक जटिलता सिर्जना भएको भन्दै उहाँले राजनीतिक दलहरुले जिम्मेवारीपूर्वक काम नगर्ने हो भने परिस्थिति नियन्त्रण बाहिर जानसक्ने बताउनुभयो । राजसंस्था नहुँदा देश अभिभावक बिहीन भएको र विदशीको चलखेल तीव्र रुपमा बढेको भन्दै अध्यक्ष थापाले केही दिन अगाडि मात्र नेकपाको घर झगडा मिलाउन उत्तरतिरबाट हवाइजहाज चार्टर गरेर केही मानिसहरु आएको जसले देशको सार्वभौमिकता माथि प्रश्न उठेको बताउनुभयो ।