माघ,२३
नवलपुरको गैंडाकोट नगरपालिकाको वडा नम्बर १२ मा निर्माण भएको आधारभूत स्वास्थ्य इकाइ भवनको उद्घाटन भएको छ । संघीय सरकारको ३८ लाख रुपैयाँ लागतमा स्वास्थ्य इकाइ भवन निर्माण भएको हो । नगरको वडा नम्बर १२ मटकुरीमा रहेको स्वास्थ्य इकाइ केन्द्रको शुक्रबार नगरप्रमुख छत्रराज पौडेलले उद्घाटन गर्नुभएको होे ।कार्यक्रममा नगरप्रमुख पौडेलले जनताको सरकार घरदैलोमै हुनुपर्छ भन्ने मान्यता अनुसार वडामै स्वास्थ्योपचार केन्द्र स्थापना गरिएको बताउनुभयो । उहाँले कर्मचारी व्यवस्थापन सहित स्वास्थ्य इकाइ स्थापना गर्नेमा गैंडाकोट नेपालकै पहिलो नगरपालिका भएको दाबी गर्नुभयो । १२ नम्बर वडाका वडाध्यक्ष थिरबहादुर थनेतको अध्यक्षतामा भएको उद्घाटन कार्यक्रममा वडा सदस्य गोविन्द कोईरालाले संघीयताको मर्म अनुसार वडामा स्थापना भएको स्वास्थ्य इकाइबाट उपलब्ध सेवा–सुविधा लिन वडाबासीलाई आग्रह गर्नुभयो । गैंडाकोट नगरपालिकाको स्वास्थ्य शाखाका सह–इन्चार्ज इन्द्रराज सापकोटाले स्वास्थ्य मन्त्रालयबाट प्राप्त हुने ६० प्रकारका औषधीसहित प्राथमिक उपचार निःशुल्क उपलब्ध हुने बताउनुभयो । वडामा स्थापना भएको स्वास्थ्य इकाइ केन्द्रमा १ जना हेल्थ असिस्टेन्ट र १ जना अनमीसहित रहने छन् । उदघाटन कार्यक्रमको संचालन स्वास्थ्य केन्द्रकी हेल्थ असिस्टेन्ट दिपा सदाशंकरले गर्नुभएको थियो ।