हिमालदेव पंगेनी गैंडाकोट
फागुन १, लाएन्स क्लव अफ मौलाकालिका लोटस र लिलिको आयोजनामा भएको पाँच दिने उद्घोषण तालिम गैंडाकोटमा शनिबार सम्पन्न भएको छ । गैंडाकोट २ मा आयोजना गरिएको सो तालिममा १५ जना सहभागि भएको लाएन्स क्लव अफ मौलाकालिका लोटस गैंडाकोटका अध्यक्ष शान्तिदेवी पौडेलले जानकारी दिनुभयो । क्लवमा आवद्ध महिलाहरु र क्लव भन्दा बाहिरका महिलाहरुको नेतृत्वकला र वाककला बृद्धि गर्ने उद्देश्यले आयोजना गरिएको कार्यक्रमले महिलाहरुको क्षमतालाई वृद्धि गर्न सफल भएको सहभागिहरुले बताएका थिए । सो तालिमको समापन कार्यक्रममा प्रमुख अतिथि रिजन चेयर पर्सन ला. नवराज कंडेलले उद्घोषण तालिमले बोल्ने कलाको विकास गर्ने भएकोले बोल्नै नसकेका कारण पछाडी पर्नबाट बन्चित नगर्ने भन्दै यस्ता प्रकारका तालिमहरु बेला बेलामा आयोजना गर्दै जानुपर्ने बताउनुभयो । लाएन्स क्लव अफ मौलाकालिका लोटसका अध्यक्ष शान्तिदेवी पौडेलको अध्यक्षतामा भएको सो कार्यक्रममा लाएन्स क्लवका चार्टर प्रेसीडेन्ट इन्दिरा पाण्डे, ला. लक्ष्मी भट्टराई लगायतका अथितिहरु रहनुभएको थियो । पत्रकार सविता तिवारीले प्रशिक्षण दिनुभएको सो तालिमको समापन कार्यक्रममा ला. सृजना पौडेलले स्वागत भाषण गर्नु भएको थियो भने कार्यक्रमको सहजीकरण ला. राधिका भण्डारीले गर्नु भएको थियो ।