फागुन ६ , गैँडाकोट
मुकुन्दपुर खानेपानी तथा सरसफाइ उपभोक्ता संस्थाको निर्वाचनबाट लोकतान्त्रिक समावेशी प्यानलका उमेदवार शेषकान्त देवकोटा विजयी हुनुभएको छ । सचिवमा बामप्रगतिशील समूहका उम्मेदवार बिनोद कुमार श्रेष्ठ विजयी हुनुभएको हो । लोकतान्त्रिक समूहका अध्यक्षका उम्मेदवार शेषकान्त देवकोटाले १२०७ मत ल्याएर विजयी हुनुभएको छ भने उहाँका प्रतिद्वन्दी बाम प्रगतिशील समूहका अध्यक्षका उम्मेदवार माधवप्रसाद कोइरालाले ११०५ मत ल्याउनुभएको निर्वाचन समितिका संयोजक लिलाधर शर्माले जानकारी दिनुभयो । उपाध्यक्षमा लोकतान्त्रिक समूहका चन्द्रदत्त जैशीले ११४५ मत ल्याएर विजयी हुनुभएको छ भने उहाँका प्रतिद्वन्दी बाम प्रगतिशील समूहका खड्कबहादुर क्षेत्रीले १०८२ मत ल्याउनुभएको छ । सचिवमा बामप्रगतिशिल समूहका विनोदकुमार श्रेष्ठले ११५९ मत ल्याएर विजयी हुनुभएको छ भने उहाँका प्रतिद्वन्दी लोकतान्त्रिक समूहका सोमबहादुर भण्डारी क्षेत्रीले १०७७ मत ल्याउनुभएको छ ।
कोषाध्यक्षमा लोकतान्त्रिक समूहका रोहिणी सदाशंकर सुनारले १११० मत ल्याएर विजयी हुनुभएको छ भने उहाँका प्रतिद्वन्दी बाम प्रगतिशील समूहका चेतना अर्याल आचार्यले ११०८ मत ल्याउनुभएको छ ।
यसैगरि महिला सदस्यहरुमा लोकतान्त्रिक समूहका तर्फबाट निर्वाचित इन्दिरा महत्तोले ११३७ र पंचुमाया चितौरेले १११२ मत ल्याउनुभएको छ । सदस्यहरुमा लोकतान्त्रिक समूहका उम्मेद्वारहरु दुर्गादत्त कंडेलले ११७७, प्रेमलाल खरेलले ११७८, बुद्धिप्रसाद न्यूरेले ११९० मत ल्याएर विजयी हुनुभएको छ भने । बुधबार भएको मतदानमा ७५.२१ प्रतिशत मत खसेको थियो । अपरान्ह ४ बजेसम्म भएको मतदानमा २४ सय २२ मत खसेको निर्वाचन समितिका संयोजक लीलाधर शर्माले जानकारी दिनुभयो । साविक मुकुन्दपुर गाविस क्षेत्रका ३२ सय २० उपभोक्ता सदस्य मतदाता रहेपनि २४२२ मतदाताले मत दिएका थिए । मतगणनामा ३२ मत बदर पाइएको थियो ।