काठमाण्डौं, असोज ८
नेपाल र चीनका सरकारको नेतृत्व गरिरहेका दुई कम्युनिष्ट पार्टीका बिचमा औपचारिक भाइचारा सम्बन्ध स्थापित भएको छ । दुई देशका कम्युनिष्ट पार्टीका बिचमा मंगलवार ६ बुँदे समझदारी पत्रमा लिखित हस्ताक्षर नै भएपछि औपचारिक सम्वन्ध स्थापित भएको हो । मंगलवार दुवै कम्युनिष्ट पार्टीका विदेश विभाग प्रमुखहरुले नेकपाका अध्यक्षद्वय केपी ओली र पुष्पकमल दाहाल (प्रचण्ड) का उपस्थितीमा हस्ताक्षर गरेपछि दुई देशका कम्युनिष्ट पार्टीका बिचमा औपचारिक भाइचारा सम्वन्ध स्थापित भएको हो । यो समझदारीसँगै अव दुवै देशका कम्युनिष्टहरुका वीचमा दुई पक्षिय उच्चस्तरीय भ्रमण आदानप्रदान, कार्यकर्ता तहको अध्ययन भ्रमण, पार्टी पार्टी अनुभव आधारित सहयोग आदानप्रदान हुनेछ । त्यस्तै, युवा र स्थानीय नेतावीच भ्रमण आदानप्रदान, जनस्तरको सम्वन्ध अभिवृद्दि र विचार सिद्दान्तमा आधारित वार्षिक कार्यक्रम सञ्चालन हुने गरी समझदारी भएको छ ।
यो समझदारीलाई नेपालमा निकै अर्थपूर्ण रुपमा हेरिएको छ । कतिपयले सत्तारुढ दल नेकपा उत्तरी छिमेकी मुलुक चिनतिर ढल्किएको विश्लेषण पनि गर्न थालेका छन् । विगतमा यी दुई कम्युनिष्ट पार्टीका बिचमा भाइचारा सम्वन्ध रहेपनि अनौपचारिक सम्वन्ध मात्र थियो ।
तर यस खालको औपचारिक सम्वन्ध भने बनेको थिएन । पार्टी एकतापछि नेकपाले चीनसँग पहिलो पटक यसरी औपचारिक सम्वन्ध कायम गरेको हो । यस अगाडी पार्टी एक नहुँदासम्म चीनको कम्युनिष्ट पार्टीले नेपालका तत्कालिन पार्टी एमाले र माओवादीसँग अलग–अलग रुपमा समदुरीको सम्वन्ध कायम गदै आएको थियो । ति सम्वन्धहरु अनौपचारिक सम्वन्ध थिए तर यो समझदारी सहितको सम्वन्धपछि भने औपचारिक रुपमा नै भाइचारा सम्वन्ध स्थापित भएको नेकपाका नेताहरुले जनाएका छन् । यो समझदारी पछि अव दुई देशका कम्युनिष्ट पार्टीका नेता कार्यकर्ताको एक अर्काे देशमा आवातजावत बढने छ भने सम्वन्ध थप विकास हुने अपेक्षा गरिएको छ ।