गैँडाकोट, ११ असार ।

आख्याकार सिम्रन क्षेत्रीको पहिलो उपन्यास “झुमर” सार्वजनिक भएको छ । साहित्यकार एलबी क्षेत्रीले शनिबार द नारायणी रिसोर्ट गैँडाकोटमा उपन्यास विमोचन गर्नुभएको हो । सम्पूर्ण किताबको आयोजनामा कृति विमोचन गरिएको थियो ।उपन्यासबारे टिप्पणी गर्दै साहित्यकार एलबी क्षेत्रीले उपन्यासमा नारी अस्तित्वलाई कथा बनाएर महिलामाथि हुने छलकपटविरूद्ध आवाज उठाएको बताउनुभयो । उहाँले हाम्रो समाजमा महिला हिंसा अझैपनि यथावत रहेको बताउनुभयो ।

सिम्रनले तिनै हिंसाका विषयवस्तुलाई झुमरमा कथाका माध्यमबाट प्रस्तुत गरेको उल्लेख गर्नुभयो ।कार्यक्रममा झुमर उपन्यासकी लेखक सिम्रन क्षेत्रीले आफूले समाजमा देखेका घटनालाई आधार बनाएर उपन्यासको निर्माण गरेको बताउनुभयो । उहाँले उपन्यास लेखनमा खासै समस्या नभएतापनि छपाइमा भने निकै समस्या बेहोर्नु परेको उल्लेख गर्नुभएको थियो ।

कार्यक्रममा चितवन साहित्य परिषदको पुर्व अध्यक्ष गायत्री श्रेष्ठ, कवि तथा आख्यानकार भुपिन खड्का, प्राध्यापक लक्ष्मी वराल, एसओेएस बालग्रामका भोलानाथ पौडेल लगायतले उपन्यासमा क्षेत्रीले महिलाहरुले जीवनमा भोगिरहेका दुःख र लैङ्गिक विभेदलाई सरल रुपमा उजागार गर्न प्रयास गरेको बताउनुभएको थियो ।कार्यक्रम सम्पुर्ण किताव नारायणगढकी सञ्चालक शिरिषा सापकोटाको अध्यक्षतामा भएको थियो ।

पुस्तकलाई एडिबी पब्लिकेसन्सले प्रकाशन गरेको हो । बुलबुल पब्लिकेसन्सले वितरण गरेको पुस्तकको मूल्य ३५०र( छ । कार्यक्रमलाई सञ्चारकर्मी सविता अधिकारीले सहजीकरण गर्नु भएको थियो ।