काठमाडौं, १३ असार ।

उपभोक्ता अधिकारबादी संस्था उपभोक्ता हित संरक्षण मञ्चले अर्थ मन्त्रालयसँग क्लोज सर्किट टेलिभिजन (सीसी टिभी) दृश्य माग गरेको छ । आर्थिक विधेयकमा करका दरहरु हेरफेर गर्न अनाधिकृत व्यक्तिको संलग्नताबारे अध्ययन गर्न भन्दै सीसी टिभी दृश्य माग गरेको हो ।सोमबार सूचनाको हक अन्तर्गतको निवेदन मन्त्रालयमा पेश गर्दै मञ्चले चालु आर्थिक वर्ष र आगामी आवको बजेट निर्माण अवधिको दुई रातको क्लोज सर्किट टेलिभिजन (सीसी टिभी) दृश्य उपलब्ध गराउन भनेको हो । मन्त्रालयका सूचना अधिकारीलाई सम्बोधन गर्दै मञ्चका सचिव जयप्रसाद पौडेलले निदेवन पेश गरेका हुन् ।

मञ्चले निवेदनमार्फत विधेयक तर्जुमा गर्दा मन्त्रालय परिसर, अर्थ तथा राजश्व सचिवको कार्यकक्ष र मन्त्रीको कार्यकक्षमा भएको ओहोर दोहोरको सम्पूर्ण दृश्य उपलब्ध गराइदिन अनुरोध गरेको छ ।सूचनाको हकसम्बन्धी ऐन २०६४ को दफा ३ र ७ बमोजिम यस्तो निवेदन दिइएको पनि मञ्चले जनाएको छ ।