देवचुली, ६ असार ।

युवा तथा खेलकुद सम्बन्धी देवचुलीका युवा खेलाडीहरुसँग अन्तरक्रिया कार्यक्रम सम्पन्न भएको छ । शुक्रबार देवचुली २ सिजी अगाडि सेन्ट्रल गेष्ट हाउसमा प्रदेश सरकार युवा तथा खेलकुद मन्त्रालय गण्डकी प्रदेशको आयोजनामा देवचुलीमा खेलकुद सम्बन्धी अन्तरक्रिया कार्यक्रम भएको हो । कार्यक्रममा प्रदेश सरकार युवा तथा खेलकुद मन्त्रालय गण्डकी प्रदेशका सचिव बद्रिनाथ अधिकारीले प्रदेशमा खेलकुदको विकास र विस्तारको विषयमा जानकारी गराउनुभएको थियो । उहाँले युवाहरुको चौतर्फी विकासका लागि मन्त्रालय खडा भएको बताउँदै युवा स्वरोजगारका लागि पनि कार्यक्रमहरु ल्याएको बताउनुभएको थियो । अधिकारीले प्रदेशले खेलकुद क्षेत्रमा आवश्यक बजेट विनियोजन गरेकाले भविष्यमा खेल प्रति चासो राख्ने खेलाडीलाई बढि प्राथमिकता दिने बताउनुभएको थियो ।

अन्तरिक्रया कार्यक्रममा उपस्थित देवचुलीका खेलाडीहरुले व्यवस्थित खेलमैदान नहुँदा खेलाडी ओझेलमा परेको गुनासो गरेका थिए । खेल क्षेत्रमा प्रदेशले बजेट विनियोजन गरेपनि भ्रष्टचारले गर्दा खेलाडी सधै पछाडी पर्ने गरेको बताएका थिए । प्रदेश सरकारले बेला–बेला अनुगमन गरि खेलाडीको समस्यालाई समाधान गर्न खेलाडीले निर्देशन गरेका थिए ।

कार्यक्रममा बोल्दै देवचुली नगरपालिकाका समाजसेवि कृष्णप्रसाद गैरेले खेलाडी देशको गहना रहेको बताउँदै खेलाडीलाई प्रोत्साहन गर्न राज्यले सम्मान गर्नुपर्ने बताउनुभएको थियो । उहाँले देवचुली नगरपालिकामा थुप्रै खेलाडी रहेकाले खेलाडीको हक हितका लागि प्रदेशले ध्यानकर्षण गर्नुपर्ने बताउनुभएको थियो । देवचुली नगरपालिकामा खेल क्षेत्रमा गर्न सकिने विभिन्न कार्यक्रमको विषयमा छलफल गरिएको थियो ।

कार्यक्रममा खेलाडी सलिना सारु, असीम सुस्लिम, सुनिल थापा, नविन चौधरी, कविता विक, रेफरी जीत बहादुर तामाङ्ग, शुक बहादुर तामाङ्ग लगायतले बोलेका थिए । कार्यक्रमको सहजीकरण प्रदेश सरकार युवा तथा खेलकुद मन्त्रालय गण्डकी प्रदेशका लेखा अधिकृत लाल प्रसाद आचार्यले गर्नुभएको थियो । खेलाडीहरुलाई प्रोत्साहन गण्डकी प्रदेशका सचिव बद्रिनाथ अधिकारीले बल हस्तान्तरण समेत गर्नुभएको थियो ।