गैँडाकोट, १० साउन ।

संसदबाट पारित भएको नागरिकता विधयकको विरोधमा राष्ट्रिय जनमोर्चा नवलपुर जिल्ला कमिटीले मंगलबार गैंडाकोटको भृकुटीचोकमा कोणसभा सम्पन्न गरेको छ । संसदबाट पारित नागरिकता विधयेक राष्ट्रघाती भएको ठहर गर्दै राष्ट्रिय जनमोर्चा नवलपुरले विरोध कार्यक्रमको आयोजना गरेको हो ।संसदले पारित गरेको नागरिकता विधयकले नेपालभित्रकै रैथाने नेपाली नागरिकहरु अल्पमतमा पर्ने खतरा उत्पन्न भएकाले नागरिकता विधेयकको बिरोध गर्नुपरेको राष्ट्रिय जनमोर्चा नवलपुरका अध्यक्ष दिपक पाण्डेले बताउनु भयो । उहाँले विदेशी हस्तक्षेपको प्रभावले नागरिकता विधेयक पारित भएको दाबी गर्नुभयो ।

कोणसभालाई सम्बोधन गर्दै अखिल नेपाल ट्रेड युनियन महासंघ (अन्टुक) का कार्यवाहक महासचिव शालिकराम सापकोटाले ठूला दलहरुबाट एमसिसी पासपछि अर्को नागरिकता विधेयक पारित गरेर राष्ट्रघात भएको बताउनु भयो ।राष्ट्रिय जनमोर्चाका पूर्वसचिव कृष्ण अधिकारीले नागरिकताजस्तो संवेदनशील विषयमा संसदमा मतदान प्रकृयामा जाँदा ध्वनि मतका आधारमा विधेयक पारित गरिनु गलत भएको बताउनु भयो ।

यस्तो कार्यले संविधानको मर्ममा प्रहार गर्ने काम भएको उहाँको भनाइ थियो ।संसदमा पहिले दर्ता भएको नागरिकता संशोधन विधेयक फिर्ता लिएर पुनः नयाँ विधेयक प्रस्तुत गरी पारित गर्नुले सरकारको नियत ठीक नदेखिएको भन्दै केही साना दलहरुले नागरिकता विधेयकको विरोध गर्दै आएका छन् ।