गैँडाकोट, २१ साउन ।

गैँडाकोट नगरपालिका वडा नं ९ मा शनिबार खुल्ला रक्तदान कार्यक्रम सम्पन्न भएको छ । जयश्री फुड्स प्रालि र जयश्री च्यारिटी नेपालको संयुक्त आयोजनामा भएको कार्यक्रममा १ सय १ जनाले रक्तदान गरेको जयश्री फुड्सका म्यानेजर अमित अग्रवालले जानकारी दिनु भयो ।

नवजागरण ग्रामिण विकास केन्द्र गैँडाकोट ९ र नेपाल रेडक्रस सोसाइटी भरतपुरको प्राविधिक सहयोगमा भएको कार्यक्रममा महिला १३ र पुरुष ८८ ले रक्तदान गरेका हुन् । कार्यक्रममा बोल्दै प्रमुख अतिथी गैँडाकोट नगरपालिकाका नगरप्रमुख मदनभक्त अधिकारीले रक्तदान गर्नु महान काम भएको बताउनु भयो ।

१ सय ११ औ पटक रक्तदान गरि सक्नु भएका खुमनाथ पौडेललाई ब्लड ब्याग हस्तान्त्रण गरी पौडेल मार्फत नै १ सय १२ औँ पटक रगत दान गरेर कार्यक्रमको सुरुवात गरिएको जयश्री फुड्सका सञ्चालिका सुमन अग्रवालले बताउनु भयोे ।  जयश्री च्यारिटी नेपाल र जयश्री फुड्स प्रालिका सञ्चालक पवन कुमार अग्रवालले बढ्दो रक्तअभावलाई पूर्ति गर्न रक्तदान कार्यक्रमको आयोजना गरिएको बताउनु भयो ।

कार्यक्रममा गैँडाकोट नगरपालिका उपप्रमुख शान्ति कोइराला, ९ का वडाध्यक्ष धामनाथ सापकोटा, निर्वतमान अध्यक्ष प्रेमप्रसाद सापकोटा, नेपाल उद्योग बाणिज्य संघ गैँडाकोटका अमृत भट्चन, रेडक्रस सब चेप्टर नारायगणका सभापति राजकुमार गुप्ता, जयश्री फुड्सका कर्मचारी लगाएत स्थानियको सहभागिता रहेको थियो । जयश्री फुड्सको नयाँभवनको प्रांगढमा भएको कार्यक्रममा पुजाआजा पनि गरिएको थियो । जयश्री फुड्स तथा च्यारिटी नेपालले सामाजिक उत्तरदायित्व अन्तर्गत विभिन्न कार्यक्रम गर्दै आएको छ ।

२०७५ सालमा काठमाडौँ महानगरपालिकामा दर्ता भएको जयश्री च्यारिटी नेपाल गैरनाफामुलक सामाजिक संस्था हो ।