गैँडाकोट, २ फागुन । गैँडाकोट नगरपालिकाको वडा नम्वर १ मा चालु आर्थिक वर्षमा १८ लाख ८६ हजार ३ सय ८७ रुपैयाँ राजश्व संकलन भएको छ । वडा सचिव पदम प्रसाद अधिकारीका अनुसार चालु आर्थिक वर्षको हालसम्म सो रकम संकलन भएको हो । वि.सं २०७४ माघ २८ गते कार्यालय स्थापना भएपछि वडाले राजस्व संकलन गर्न सुरु गरेको थियो ।

वडा कार्यालय स्थापना पश्चात वडामा १ करोड ४७ हजार ६ सय ४४ रुपैयाँ राजस्व संकलन भएको सचिव अधिकारीले बताउनुभयो । जसमा आर्थिक वर्ष २०७४/७५ मा ६ लाख ७० हजार २५३ रुपैयाँ राजस्व संकलन भएको थियो भने २०७५/७६ मा बृद्धि भएर २४ लाख ४७ हजार ५४१ रुपैयाँ संकलन भएको थियो । यस्तै आर्थिक वर्ष २०७६/७७ मा भने राजस्व संकलन दर घट्न पुगेको छ । वडाले प्रस्तुत गरेको तथ्यांकमा सो वर्षमा संकलित रमक घटेर २२ लाख ४२ हजार १५५ पुगेको देखिन्छ ।

यस्तै २०७७/७८को असार मसान्तसम्म राजस्व संकलन दर वृद्धि भएर २८ लाख ३४ हजार ९९८ रुपैँया पुगेको छ । सचिव अधिकारीले वडामा राजस्व संकलनको मुख्य स्रोतको रुपमा एकिकृत सम्पत्ती कर रहेको नै रहेको बताउनुभयो । उहाँका अनुसार वडाले सम्पती कर, व्यवसाय दर्ता, विभिन्न किसिमका सिफासिर दस्तुरबाट राजश्व संकलन गरिरहेको छ ।

सचिव अधिकारीका अनुसार वडामा संकलन भएको राजस्व गैँडाकोट नगरपालिकामा जम्मा हुने गर्दछ । पछि नगरपालिकाबाट विनियोजन भएर पुनः उक्त रकम वडामा विभिन्न शिर्षकको रुपमा विभाजन भएर आउने गरेको छ ।