गैँडाकोट, १६ फागुन । भरतपुरको गौरेश्वर पशुपति मन्दिरको रजत महोत्सव सुरु भएको छ । सोमबार गलेश्वर आश्रम देवघाटधामका पिठाधिश अनन्तश्री विभुषित महामण्डेश्वर स्वामी आत्मानन्द गिरीले महोत्सवको समुद्घाटन गर्नुभएको हो ।

सो अवसरमा बोल्दै उहाँले ज्ञान, इच्छा र कृपाशक्ति भयो भने मानिसले जस्तोसुकै कठिन कामपनि गर्ने सक्ने बताउनुभयो । उहाँले ठुलो मन्दिरमा ठुलै भगवान र साना मन्दिरमा साना भगवान नहुँने भन्दै भगवानको महिमा अपरम्पार हुने उल्लेख गर्नुभयो । साथै आफुलाई निमन्त्रणा गरेकोप्रति आयोजकलाई धन्यवाद दिदै महोत्सव भव्य रुपमा सम्पन्न होस् भन्दै शुभकामना व्यक्त गर्नुभएको थियो ।

महोत्सव समुद्घाटन कार्यक्रममा देवघाट क्षेत्रविकास समितिका अध्यक्ष बद्री प्रसाद अधिकारी, शेषलक्ष्मी नारायण मन्दिर क्षेत्रपुरका मठाधिश पद्मनाभाचार्य लगायतले रजत महोत्सव सफलताको शुभकामना व्यक्त गर्नुभएको थियो ।

सो अवसरमा श्री गौरेश्वर पशुपति मन्दिरको रजत स्मारिका २०७८ को विमोचन समेत गरिएको थियो । दुईदिनसम्म सञ्चालन हुने सो महोत्सवको सुरुको दिन सोमबार विहान ७ः३० बजे शोभायात्रा, ११ः३० बजे समुद्घाटन, मध्यान्न १२ बजे स्मारिका विमोचन, दिउसो १ बजेदेखि २०५० सालदेखि हालसम्म रु १० हजार भन्दा माथि आर्थिक सहयोग गर्ने चन्दादातालाइ सम्मान कार्यक्रम गरिएको थियो ।

श्री गौरेश्वर पशुपति मन्दिर समितिका अध्यक्ष सुर्यकुमार प्रकाण्ड पियाको अध्यक्षतामा भएको सञ्चालन भएको रजत महोत्सवको स्वागत रजत महोत्सव मुल आयोजक समितिका सहसंयोजक शैलेन्द्र पियाले गर्नुभएको थियो ।