नवलपुर, १७ फागुन । तनहुँको देवघाट गाउँपालिका–५ मा पर्ने दासढुंगा कालिमाटीमा मुक्तिनाथ मन्दिरको शिलान्यास गरिएको छ । कालिमाटीमा ज्येष्ठ नागरिक सेवा आश्रम सञ्चालन गर्ने तयारीमा रहेको श्री जगन्नाथ शान्ति कुञ्जले मुक्तिनाथबाट जल ल्याएर यहाँ पनि मुक्तिनाथ मन्दिर निर्माणको काम शुरु गरेको हो ।

कुञ्जका अध्यक्ष शैलेन्द्र पियाका अनुसार मुक्तिनाथ मन्दिरको झल्को दिने खालको मन्दिर त्रिशूली नदी किनारमा निर्माण हुनेछ । सो स्थानमा मुक्तिनाथ मन्दिरमात्रै नभएर सम्पूर्ण हिन्दु संस्कृति झल्किने खालको वातावरण तयार पार्ने पियाले बताउनुभयो । मन्दिरको शिलान्याससँगै यहाँ ज्येष्ठ नागरिक सेवा आश्रम सञ्चालनको तयारी भइरहेको पियाले बताउनुभयो ।

यहाँ निर्माण गरिएको आश्रमको उद्घाटन गर्न प्रधानमन्त्रीलाई ल्याउने तयारी भइरहेको समेत पियाले जानकारी दिनुभयो । देवघाटलाई धार्मिक शहर बनाउने आफ्नो योजनाअनुसार नै ज्येष्ठ नागरिक सेवा आश्रम निर्माण गरेर अगाडि बढेको पियाले बताउनुभयो । धार्मिक शहरमा संसारभर रहेका हिन्दु धर्मावलम्बीहरु अध्ययन अवलोकन गर्न आउनसक्ने गरी काम अगाडि बढाएको उहाँको भनाइ छ ।

आश्रममा नौ वटा कोठा निर्माण भइसकेका छन् । जीवनको उत्तराद्र्धमा धर्मकर्म गरी बस्न चाहने व्यक्तिहरुलाई लक्षित गरेर आश्रम सञ्चालन गरिएको उल्लेख गर्दै पियाले आश्रममा आजीवन बस्न चाहने ६० वर्षमाथिका एक जनाले १० लाख रुपैयाँ तथा श्रीमान्श्रीमती बस्ने भए १५ लाख रुपैयाँ बुझाउनुपर्ने बताउनुभयो ।

छोराछोरी विदेशमा भएर नेपालमा एक्लै बस्नुपर्ने बाध्यता भएका ज्येष्ठ नागरिकलाई लक्षित गरि आश्रम निर्माण गरिएको भन्दै पियाले आफैले घर बनाएर बस्न चाहेमा पनि २० लाख रुपैयाँ प्रदान गरेर बस्न सकिने बताउनुभयो । त्यहाँ आश्रममा घर बनाएर बसेका व्यक्तिको मृत्यु पछि उक्त घर आश्रमको नाममा जाने समेत पियाले बताउनुभयो । सुरुमा पैसा लिएर आश्रममा राखिने भए पनि पछि पैसा नहुनेहरु राख्ने समेत आफूहरुको योजना रहेको उहाँले बताउनुभयो ।

कार्यक्रमकी प्रमुख अतिथि समाजसेवी गौरी प्रधानले उक्त स्थानको विकासका लागि आफूले काम गर्ने बताउनुभयो । देवघाट गाउँपालिका अध्यक्ष दुर्गबहादुर थापाले आश्रम निर्माणका लागि गाउँपालिकाले २१ रोपनी जग्गा दिएको बताउनुभयो । सो स्थानको विकासका लागि गाउँपालिकाले आश्रमको गेट निर्माणसँगै सडक समेत निर्माण गर्ने थापाले बताउनुभयो । आफूहरु जनप्रतिनिधि भएर आएपछि सिक्दैमा दुई वर्ष बितेको उल्लेख गर्दै थापाले त्यसपछि केही समय कोभिडका कारण असर परे पनि बाँकी समयमा सक्दो काम गरेको बताउनुभयो ।