काठमाडौं, १९ फागुन । नेपाल पत्रकार महासंघले पत्रकार उमाकान्त पाण्डेको रिहाइका लागि सरकारलाई आग्रह गरेको छ । सामाजिक सञ्जाल फेसबुकमार्फत युएईस्थित नेपाली दूतावासको आलोचना गरेकै आरोपमा वैदेशिक रोजगारीका सिलसिलामा युएईमा रहेका पाण्डेले तीन महिना जेल सजाय र झन्डै आठ लाख रुपैयाँ जरिवाना तिर्नुपर्ने दुबई अदालतले फैसला गरेको थियो ।

उनीविरुद्व त्यहाँको अदालतमा मुद्दा चलेको छ।

महासंघका अध्यक्ष विपुल पोखरेल, महासचिव रोशन पुरी र केन्द्रीय सदस्य प्रकाश धौलाकोटी सम्मिलित महासंघको टोलीले बिहीबार परराष्ट्रमन्त्री नारायण खड्कालाई भेटेर पत्रकार पाण्डेको रिहाइका लागि नेपाल सरकारको तर्फबाट पहल गरिदिन आग्रह गरेका हुन्।

जवाफमा मन्त्री खड्काले पत्रकार पाण्डेको अवस्थाबारे बुझेर दूतावासमार्फत उनको रिहाइका लागि पहल गर्ने बताए। पत्रकार पाण्डे उज्यालो रेडियो नेटवर्कमा कार्यरत थिए ।