चितवन, २२ असार।

निर्माण व्यवसायी संघ चितवनको २८औँ वार्षिक साधारणसभा तथा अधिवेशनले आगामी दुई वर्षका लागि संघको १७ सदस्यीय नयाँ कार्यसमिति निर्विरोध निर्वाचित गरेको छ । बिहीबारदेखि शुरु भएको संघको साधारणसभा तथा अधिवेशनले केशवप्रसाद लामिछानेको अध्यक्षतामा १७ सदस्यीय कार्यसमिति निर्विरोध निर्वाचित गरेको हो । संघको निर्वाचन समिति संयोजक राजेन्द्रमणि काफ्लेकाअनुसार संघमा रहेको पदमा आवश्यक बमोजिमको मात्रै उम्मेदवारी परेका कारण सबै पदमा निर्विरोध निर्वाचित गरिएको हो । निर्वाचन समितिले बिहीबार नै निर्वाचन कार्यतालिका सार्वजनिक गरेको थियो ।

संघका निर्विरोध निर्वाचित कार्यसमितिको प्रथम उपाध्यक्षमा दिनेशचन्द्र न्यौपाने, द्वितीय उपाध्यक्षमा माधवप्रसाद पोखरेल, महासचिवमा पुष्कर अधिकारी, सचिवमा शिवलाल ढकाल, कोषाध्यक्षमा प्रकाश तिवारी तथा सहकोषाध्यक्षमा अशोक लोहनी रहनुभएको छ । त्यस्तै, महिला सदस्यमा रोजिना भट्टराई खुला सदस्यहरुमा प्रकाशराज भट्टराई, ठानेश्वर कँडेल, अरुण श्रेष्ठ, नवीनकुमार थापा, मानबहादुर दंगाल क्षेत्री, मनोज अर्याल, वसन्त खरेल र भुवनप्रसाद सुवेदी रहनुभएको छ । निर्विरोध निर्वाचित कार्यसमितिलाई आइतबार नै पद हस्तान्तरण तथा पद तथा गोपनीयताको सपथ ग्रहण गराइएको संघका अधिकृत शङ्कर अधिकारीले जानकारी दिनुभयो ।