गैँडाकोट, १८ असार । आख्यानकार निर्दोष जीवनको उपन्यास “नोस्टाल्जिया” विमोचन भएको छ । प्रमुख अतिथी एलबी क्षेत्री, वरिष्ठ साहित्यकार गोविन्दराज विनोदी श्रष्टा नीलम कार्की निहारिका, साहित्यकार सिर्जन अविरल र जयराज रेग्मी मगरले उपन्यास विमोचन गर्नुभएको हो । शनिबार सम्पूर्ण किताब नारायणगढको आयोजनामा द नारायणी रिसोर्ट गैँडाकोटमा कृति विमोचन गरिएको हो । निर्दोष जीवनको यो नवौँ कृति हो ।

सो अवसरमा वोल्दै प्रमुख अतिथी एलबी क्षेत्रीले निर्दोष जीवनले नोस्टाल्जिया उपन्यास मार्फत आफ्नो जीवन कहानी छर्लङ्ग उतारेको बताउनुभयो । उहाँले यस उपन्यास मार्फत आम पाठकले संघर्षको परिभाषा बुझन सहज हुने उल्लेख गर्नुभयो ।
क्षेत्रीले पुस्तक लेख्ने विषय सजिलो नभएको टिप्पणी गर्नुभयो । कुनैकुनै श्रष्टाले लेख्न सजिलो तर छपाई गर्न गाह्रो भन्ने गरेको विषयलाई खण्डन गर्दै उहाँले यस्तो बताउनुभएको हो । उहाँले लेखाइको माध्यमबाट कुनैपनि विषयवस्तुलाई साहित्यमा ढाल्न निकै गाह्रो हुने उल्लेख गर्नुभयो ।

वरिष्ठ साहित्यकार गोविन्द विनोदीले आख्यानकार निर्दोषले जीवनको ९८ प्रतिशत भोगाई र वाकी २ प्रतिशत कला प्रस्तुत गर्नुभएको बताउनुभयो । उहाँले उपन्यासको सफलताको शुभकामना व्यक्त गर्नुभयो ।

कार्यक्रममा आख्यानकार सिर्जन अविरल र श्रष्टा नीलम कार्की निहारिकाले पुस्तकको टिप्पणी गर्दै पुस्तकमा शत प्रतिशत यथार्थता र लेखकको इमान्दारीता सवल पक्ष रहेको उल्लेख गर्नुभयो । साथै उपन्यासमा व्यक्तिको जीवनको संघर्ष, बाध्यताले गर्नुपरेको बसाइँसराइ र त्यसले पाएका दुःख, चेलीबेटी बेचविखनले लुटिएको नारीको अस्तीत्व लगायतको विषयवस्तुलाई यथार्थपरक ढङ्गले प्रस्तुत गरिएको उल्लेख गर्नुभएको थियो ।

लेखक निर्दोश जीवनले जीवनमा आफुले भोगेका एक एक पललाई कथाको माध्यमबाट उपन्यासमा उतारेको बताउनुभयो । उहाँले आफ्नै माहिली दिदि भारतमा बेचीएको, एचआइभी एड्सको सिकार भएको र मृत्यु वरण गर्नुपरेको घटना, आफ्नो संघर्षरत जीवनमा जीवनसंगीनीले दिएका साथलाई उपन्यासको माध्यमबाट प्रस्तुत गरेको उल्लेख गर्नुभयो ।

सम्पुर्ण किताव नारायणगढका सञ्चालक लेखराम सापकोटाले सहजीकरण गर्नुभएको कार्यक्रममा साहित्यकार जयराज रेग्मी, आकाश पौडेल लगायतले बोल्नुभएको थियो ।