सुर्खेत, २४ असार । जिल्ला अदालत, सुर्खेतले राउटे युवतीमाथि यौन दुर्व्यवहार गर्ने दुई जनालाई कैद र जरिवाना तोकेको छ । न्यायाधीश राजेन्द्रकुमार आचार्यको इजलासले यौन दुर्व्यवहार गर्ने दुई जनालाई सात–सात वर्ष कैद र जनही दुई लाख रुपैयाँ जरिवाना तोकेको हो । अदालतले यौन दुर्व्यवहार भएको होटलका सञ्चालकलाई समेत ३ वर्ष ६ महिना कैद र एक लाख रुपैयाँ जरिवाना तोकेको छ ।

चौमन घर्ती मगर र भूपेन्द्र बुढा मगरले यौन दुर्व्यवहार गरेका हुन् । उनीहरूले पीडित राहत कोषमा जनही ८ हजार रुपैयाँ जम्मा गर्नुपर्नेछ । होटल सञ्चालक मनबहादुर पुनले ४ हजार रुपैयाँ पीडित राहत कोषमा जम्मा गर्नुपर्नेछ ।

जिल्लाको गुर्भाकोट नगरपालिका–९ बोटेचौरको शुभकामना होटलमा २०७८ जेठ २१ गते राति राउटे युवतीमाथि यौन हिंसा भएको थियो ।
राउटे युवतीलाई मदिरा खुवाएर यौन हिंसा गरेको भिडिओ सामाजिक सञ्जालमा सार्वजनिक भएको थियो । प्रहरीले जेठ २३ गते उनीहरूलाई प्रक्राउ गरेको थियो ।