गैँडाकोट, १९ साउन । नेपालका सफल सहकारीमध्ये एक विकू बचत तथा ऋण सहकारी संस्था लिमिटेड, गैँडाकोटले संस्थाको ३२औँ वार्षिकोत्सवका अवसरमा दुई सातासम्म १२ थरी कार्यक्रमको आयोजना गर्ने भएको छ । विकूले बिहीबार गैँडाकोटमा पत्रकार सम्मेलनको आयोजना गरी वार्षिकोत्सवका कार्यक्रम सार्वजनिक गरेको हो ।

घोषित कार्यक्रम अनुसार साउन २१ गते शनिबार कर्मचारीहरुबीच चम्चा दौड, मोटरसाइकल स्लो रेस, फुटबल र नृत्य प्रतियोगिता रहेका छन् । साउन ३० गते कावासोतीमा र ३१ गते गैँडाकोटमा विद्यार्थीहरुबीच हाजिरीजवाफ प्रतियोगिता आयोजना हुनेछ । भदौ १ देखि ५ गतेसम्म संचालक समिति, विभिन्न उपसमिति र कर्मचारीको सहभागितामा विभिन्न कार्यक्रम आयोजना गर्न लागिएको संस्थाका सचिव प्रेमप्रसाद सापकोटा ‘राजु’ले जानकारी दिनुभयो ।

तत्कालीन विजय युवा क्लबको सक्रियतामा २६ जना सदस्य मिले २०४८ साल भदौ ५ गते विजय युवा क्लब क्रेडिट युनियन (विकू) संचालनमा आएको थियो । कालान्तरमा विजय युवा क्लब विजय विकास स्रोत केन्द्रमा परिणत भयो । क्रेडिट युनियनचाहिँ विकू बचत तथा ऋण सहकारी बन्यो । दैनिक २६ जना सदस्यबाट दैनिक ५० पैसाका दरले मासिक १५ रुपैयाँ बचत गरेर सुरु भएको विकूसँग अहिले कर्मचारीमात्रै २ सय जना छन् । शेयर सदस्य एक लाखभन्दा बढी पुगेका छन् । शेयर पुँजी ९० करोड रुपैयाँभन्दा धेरै छ । विकूका विशेषता बयान गर्दै संस्थाका प्रमुख कार्यकारी अधिकृत माधव पौडेलले विकूबाट ९ प्रतिशत ब्याजदरमा २० लाख रुपैयाँसम्म कृषि ऋण प्रवाह भएको बताउनुभयो ।

विकूले २०५४ सालमा नेपाल राष्ट्र बैंकबाट सीमित बैंकिङ कारोबार गर्ने स्वीकृति पाएपछि सदस्यहरुबाट निक्षेप संकलन गरी बढीभन्दा बढी सेवा पु¥याउँदै आएको छ । प्रचलित सहकारी सिद्धान्त, मूल्य र मान्यता, सहकारी ऐन, नियमावली र निर्देशनभित्र रही संस्था प्रजातान्त्रिक ढंगबाट चलिरहेको र आज अन्तर्राष्ट्रिय ख्याति कमाउन सफल भएको संस्थाका अध्यक्ष ओमप्रसाद सापकोटा बताउनु हुन्छ ।

संस्थाका उपाध्यक्ष यमनाथ आचार्यले स्वागत मन्तव्य व्यक्त गर्नुभएको पत्रकार सम्मेलनमा कोषाध्यक्ष कालिदास गौडेल, सहसचिव माया खरेल, लेखा सुपरिवेक्षण समितिका संयोजक कमल सुवेदीलगायतको उपस्थिति रहेको थियो ।
यसैबीच, संस्थाका अध्यक्ष सापकोटाले संस्थाको परिसरमा राखिएको विपद् व्यवस्थापन घुम्ती गृहको बिहीबार नै उद्घाटन गर्नुभएको छ । विपद् व्यवस्थापन गृहमा बेल्चा, बाल्टी, आगो निभाउने ग्यास (फायर एक्स्टिङग्युसर) लगायतका सामग्री राखिएको छ ।